Аж үйлдвэр, эрдэс баялгийн сайд Ц.Туваан, Төр засгийн холбогдох албаныхан Шивээхүрэн боомт, Нарийнсухайтын бүлэг орд, Гурван тэс – XXXV талбайд ажиллалаа.

Уул уурхайн бүтээгдэхүүний экспортыг богино хугацаанд эрчимжүүлэх, валютын нөөцийг нэмэгдүүлэх үүрэг бүхий Ажлын хэсэг Ханги, Гашуунсухайт болон Шивээхүрэнгийн боомтуудад ажиллаж, нөхцөл байдалтай газар дээр нь танилцлаа.

Нарийнсухайтын бүлэг ордод үйл ажиллагаа явуулж байгаа дотоод, гадаадын хөрөнгө оруулалттай найман аж ахуйн нэгж Шивээхүрэнгийн боомтоор нүүрс экспортолж байна.

Компаниуд нүүрсний олборлолтын өртгөө бууруулах, экспортын бодит хэмжээгээ нэмэгдүүлэх зорилт тавьсан бөгөөд энэ онд экспортын хэмжээг 25-26 сая тоннд хүргэхээр төлөвлөж, тулгамдаж буй болон шийдвэрлүүлэх шаардлагатай асуудлуудаа нэгтгэн Засгийн газрын гишүүдэд танилцууллаа. Тус боомтоор ААН-үүд өнгөрсөн онд 24 сая тонн нүүрс экспортолжээ.

Ажлын хэсэг томилолтын хүрээнд Шивээхүрэн-Сэхэ боомтын нарийн царигийн төмөр замын хил холболтын бүтээн байгуулалт, Шивээхүрэн чингэлэгт терминал, AGV тээвэр болон “Тэлмэн Ресурс” компанийн хэрэгжүүлж буй нүүрсний давхаргын метан хийн төслийн талбайд ажиллан, төслийн явцтай танилцлаа. Өдгөө уурхай гүнзгийрч, хөрс хуулалтын хэмжээ нэмэгдэж, тээврийн зай уртсан, нүүрс олборлолтын өртөг жил бүр өсөж байгааг аж ахуйн нэгжүүд хэллээ. Мөн нүүрсний АМНАТ тооцох жишиг үнийг эргэн харах, хөдөлмөрийн зах зээл дээрх ажиллах хүчний хомсдол аж ахуйн нэгжүүдэд тулгамдсан асуудлын нэг болж байгааг дурдлаа.

Монгол Улсын Засгийн газрын 203 дугаар тогтоолоор эрх олгосны дагуу Тэлмэн ресурс ХХК нь АМГТГ-тай 2021 оны 07 дугаар сарын 27-ны өдөр Гурван тэс – XXXV талбайд нүүрсний давхаргын метан хийн хайгуулын БХГ байгуулсан бөгөөд өнгөрсөн хугацаанд 120 т.км 2 хэмжээст чичирхийллийн судалгаа, хайгуул, туршилтын 11 цооног өрөмдсөн байна. Метан хийн туршилтын ажил амжилттай үргэлжилж байна.

Эх сурвалж:

Газрын тос, бүтээгдэхүүний газар 

Дарга

Ч.Чулуунбат

Утас: 51-263750

2025-03-28